వాహనాల ప్రపంచంలో కొన్ని కార్లు కేవలం ప్రయాణానికి మాత్రమే కాదు, విలాసం, ప్రతిష్ఠ, అరుదైన కళాత్మకతకు ప్రతీకలుగా నిలుస్తాయి. అలాంటి కార్లలో ప్రపంచంలోనే అత్యంత ఖరీదైన ప్రయాణికుల కారుగా గుర్తింపు పొందింది రోల్ల్స్ రాయిస్ ల రోజ్ డ్రాప్టెయిల్ . ఈ కారు విలువ సుమారు ముప్పై మిలియన్ అమెరికా డాలర్లు, అంటే భారత కరెన్సీలో దాదాపు రెండు వందల యాభై కోట్ల రూపాయలకు పైగా అని అంచనా వేస్తున్నారు.
ఈ కారును బ్రిటన్కు చెందిన ప్రముఖ విలాసవంతమైన వాహన తయారీ సంస్థ రాయల్స్ రాయిస్ ప్రత్యేకంగా తయారు చేసింది. అత్యంత సంపన్న వినియోగదారుల కోసం రూపొందించే ప్రత్యేక శ్రేణిలో భాగంగా ఈ కారు నిర్మించబడింది. ప్రపంచంలో కేవలం కొద్ది మంది ధనికుల కోసం మాత్రమే రూపొందించిన అరుదైన నమూనాల్లో ఇది ఒకటి.
ఈ కారుకు “లా రోజ్ నోయర్” అనే పేరు పెట్టడానికి కూడా ప్రత్యేక కారణం ఉంది. ఫ్రాన్స్లో కనిపించే అరుదైన నల్ల గులాబి పువ్వు నుంచి ఈ పేరు తీసుకున్నారు. ఆ పువ్వు ఆకారాన్ని ఆధారంగా చేసుకుని కారులోని అంతర్గత అలంకరణలు రూపొందించారు. కారులో ఉపయోగించిన కలపపై సూక్ష్మంగా చెక్కిన ఆకృతులు ఆ గులాబి పువ్వును గుర్తు చేసేలా ఉంటాయి.
ఈ కారు నిర్మాణంలో వందలాది గంటల శ్రమ పెట్టారు. నిపుణులైన కళాకారులు చేతితోనే అనేక భాగాలను తయారు చేశారు. ముఖ్యంగా కారులోని కలప అలంకరణను రూపొందించడానికి వేలాది చిన్న కలప ముక్కలను జాగ్రత్తగా అమర్చారు. ఈ పని పూర్తయ్యేందుకు చాలా నెలలు పట్టిందని సంస్థ తెలిపింది.
ఈ కారులో ప్రయాణించే వారికి అత్యంత సౌకర్యం కల్పించే విధంగా అంతర్గత రూపకల్పనను చేశారు. అత్యంత నాణ్యమైన తోలు పదార్థాలు, అరుదైన కలప, ఆధునిక సాంకేతిక వ్యవస్థలు ఇందులో ఉన్నాయి. కారులో పైకప్పును అవసరానికి అనుగుణంగా తెరవగలిగే విధంగా రూపొందించారు. దీని వల్ల ప్రయాణ సమయంలో ఆకాశాన్ని ప్రత్యక్షంగా చూడగలిగే ప్రత్యేక అనుభూతి లభిస్తుంది.
ఇంజిన్ శక్తి పరంగా కూడా ఈ కారు అత్యంత శక్తివంతమైనది. శక్తివంతమైన పన్నెండు సిలిండర్ల ఇంజిన్ను ఉపయోగించారు. దీని వల్ల ఈ భారీ విలాసవంతమైన కారు సాఫీగా, నిశ్శబ్దంగా ప్రయాణిస్తుంది. సౌకర్యం, భద్రత, సాంకేతికత అన్నీ కలగలిపి అత్యున్నత ప్రమాణాలతో రూపొందించబడింది.
ఈ కారు తయారీ వెనుక ఉన్న ముఖ్య ఉద్దేశ్యం కేవలం వేగం లేదా ప్రయాణ సౌకర్యం మాత్రమే కాదు. ఇది ఒక కళాఖండంలా భావించే విధంగా రూపుదిద్దుకుంది. అందుకే దీనిని చాలామంది “చక్రాలపై నడిచే కళా నిర్మాణం”గా కూడా అభివర్ణిస్తున్నారు.
ప్రపంచంలో అత్యంత ఖరీదైన ప్రయాణికుల కారుగా నిలిచిన ఈ వాహనం విలాసవంతమైన వాహనాల రంగంలో ఒక మైలురాయిగా నిలిచింది. సంపద, కళాత్మకత, సాంకేతిక నైపుణ్యం కలిసినప్పుడు ఎలా అద్భుతమైన సృష్టి రూపుదిద్దుకుంటుందో ఈ కారు స్పష్టంగా చూపిస్తుంది.
(సి.హెచ్.ప్రతాప్)
