మాజీ ఎమ్మెల్సీ ఆదిరెడ్డి అప్పారావు మహిళపై దుర్భాషలాడుతూ, బెదిరింపులకు దిగినట్లు ఆరోపణలు ఎదుర్కొంటున్న ఫోన్ కాల్ ఆడియో సోషల్ మీడియాలో వైరల్గా మారింది. ఈ ఘటన తూర్పు గోదావరి జిల్లాలో తీవ్ర చర్చకు దారి తీసింది.
వివరాల్లోకి వెళితే, రాజమండ్రి సిటీ టీడీపీ ఎమ్మెల్యే ఆదిరెడ్డి శ్రీనివాస్ తండ్రి అయిన అప్పారావు ఓ మహిళతో ఫోన్లో మాట్లాడుతూ తీవ్రస్థాయిలో హెచ్చరికలు చేసినట్లు ఆ ఆడియోలో వినిపిస్తున్నట్లు సమాచారం. మహిళ ఇంటికి ఒక వ్యక్తి రాకపోకలపై అభ్యంతరం వ్యక్తం చేసిన ఆయన, ఆమె కుమారుడు ఎక్సైజ్ శాఖలో చేస్తున్న ఉద్యోగాన్ని తొలగింపజేస్తానని బెదిరించినట్లు తెలుస్తోంది.
ఇక మంత్రి కొల్లు రవీంద్ర పేరును ప్రస్తావిస్తూ, తన ప్రభావంతో చర్యలు తీసుకునేలా చూస్తానని హెచ్చరించినట్లు ప్రచారం జరుగుతోంది. అదేవిధంగా సంబంధిత వ్యక్తిపై దాడి చేస్తానని తీవ్రంగా హెచ్చరించినట్లు ఆడియోలో వినిపిస్తున్నది.
మహిళలపై అనుచితంగా మాట్లాడటం సరికాదని బాధితురాలు చెప్పేందుకు ప్రయత్నించినప్పటికీ, ఆయన మరింత ఆగ్రహంగా స్పందించినట్లు తెలుస్తోంది. ఈ ఘటనపై రాజకీయ వర్గాల్లోనూ, సామాజిక మాధ్యమాల్లోనూ తీవ్ర స్పందనలు వ్యక్తమవుతున్నాయి.
ఇటీవలే మరో ఫోన్ కాల్ వివాదం చర్చనీయాంశంగా మారిన నేపథ్యంలో, తాజా ఆడియో వెలుగులోకి రావడం మరింత కలకలం రేపుతోంది. ఈ వ్యవహారంపై అధికారికంగా స్పందన రావాల్సి ఉంది.
