జీవితంలో విజయ శిఖరాలను అధిరోహించడానికి అనేక మార్గాలు ఉండవచ్చు. వాటన్నింటిలోకి అత్యంత పవిత్రమైనది, శాశ్వతమైనది కష్టపడి పనిచేయడం. కేవలం కఠోర శ్రమ మాత్రమే మనిషికి నిజమైన గుర్తింపును, గౌరవప్రదమైన ప్రతిఫలాలను అందిస్తుంది. సోమరితనం మనిషిని వెనక్కి నెడితే శ్రమ అతడిని ప్రపంచం గర్వించే స్థాయికి తీసుకెళ్తుంది. లోకంలో అద్భుతాలు సాధించిన ఏ వ్యక్తి జీవితాన్ని చూసినా వారి విజయాల వెనుక నిరంతర శ్రమ, అంకితభావం కనిపిస్తాయి. కృషి ఉంటే మనుషులు రుషులవుతారన్న మాట అక్షర సత్యం. శ్రమ అనేది ఒక తపస్సు లాంటిది. అది ఎప్పుడూ వృథా పోదు. శ్రమించే తత్వం ఉన్నవాడికి సాధ్యం కానిది ఏదీ ఉండదు. కష్టపడి పనిచేసే గుణం ఉన్నవారు ఎంతటి అడ్డంకులు ఎదురైనా వాటిని అధిగమించి ముందుకు సాగుతారు. విజయానికి కురుకుదారులు ఉండవు అన్నది వాస్తవం. క్రమశిక్షణతో కూడిన నిరంతర శ్రమ మాత్రమే ఒక వ్యక్తిని ఉన్నత స్థితికి చేరుస్తుంది. శ్రమ అనేది కేవలం శారీరకమైనదే కాదు మానసిక ఏకాగ్రతతో కూడినది కూడా. ఏ రంగంలోనైనా రాణించాలంటే ఆ రంగం పట్ల మక్కువతో పాటు అకుంఠిత దీక్ష ఉండాలి.
మనం చేసే పని చిన్నదా పెద్దదా అన్నది ముఖ్యం కాదు. ఆ పనిని ఎంత నిబద్ధతతో చేస్తున్నాం అన్నదే ముఖ్యం. పొలంలో చెమట చిందించే రైతు నుండి అంతరిక్షంలో ప్రయోగాలు చేసే శాస్త్రవేత్త వరకు ప్రతి ఒక్కరూ తమ శ్రమ ద్వారానే ఫలితాలను పొందుతున్నారు. శ్రమ పడకుండా వచ్చే ఏ ఫలితమైనా తాత్కాలికమే. సులభంగా వచ్చే విజయాలు అంతే సులభంగా కనుమరుగవుతాయి. కష్టపడి సంపాదించుకున్న విజయం ఎంతో తృప్తిని ఇస్తుంది. శ్రమించే వ్యక్తికి తన మీద తనకి ఆత్మవిశ్వాసం పెరుగుతుంది. ఈ ఆత్మవిశ్వాసమే అతడిని సమాజంలో ధైర్యంగా నిలబెడుతుంది. కష్టపడటం వల్ల కేవలం ఆర్థిక ఫలితాలే కాకుండా శారీరక దృఢత్వం, మానసిక ప్రశాంతత కూడా లభిస్తాయి. పనిచేయడంలో ఉండే ఆనందం సోమరితనంలో ఎప్పటికీ దొరకదు. శ్రమ జీవికి కాలం ఎప్పుడూ కలిసొస్తుంది. ప్రతికూల పరిస్థితులను కూడా తన వైపు తిప్పుకునే శక్తి కష్టపడే మనిషికి ఉంటుంది. ప్రతి రోజూ కొత్త విషయాలను నేర్చుకుంటూ ముందుకు సాగడం శ్రమలో భాగమే. శ్రమించడం వల్ల మెదడు చురుగ్గా మారుతుంది. ఆలోచనా శక్తి పెరుగుతుంది.
చరిత్రను తిరగరాసిన గొప్ప నాయకులు, పారిశ్రామికవేత్తలు అందరూ శ్రమను నమ్ముకున్నవారే. థామస్ ఆల్వా ఎడిసన్ వేల సార్లు విఫలమైనా పట్టుదలతో శ్రమించి విద్యుత్ దీపాన్ని కనుగొన్నారు. అబ్రహం లింకన్ అనేక ఓటములను ఎదుర్కొన్నా తన నిరంతర కృషితో అమెరికా అధ్యక్షుడు అయ్యారు. ఇలాంటి మహానుభావుల విజయ రహస్యం కేవలం వారి తెలివితేటలు మాత్రమే కాదు. వారి వెనుక ఉన్న అలుపెరగని శ్రమ. తెలివితేటలు ఉండి శ్రమించకపోతే అవి నిరుపయోగంగా మిగిలిపోతాయి. సామాన్యమైన తెలివితేటలు ఉండి కూడా కష్టపడి పనిచేసే వారు అద్భుతాలు చేయగలరు. కాబట్టి యువత పక్కదారి పట్టకుండా శ్రమను నమ్ముకోవాలి. కష్టపడి పనిచేయడం ద్వారా వచ్చే ప్రతిఫలం ఒక తీపి జ్ఞాపకంలా మిగిలిపోతుంది. ఆ ప్రతిఫలం దక్కడానికి సమయం పట్టవచ్చు గానీ రావడం మాత్రం ఖాయం. శ్రమ నీ ఆయుధం అయితే విజయం నీ బానిస అవుతుంది అన్న మాటను ప్రతి ఒక్కరూ గుర్తుంచుకోవాలి. విద్యార్థులు తమ విద్యాభ్యాసంలో కష్టపడితేనే భవిష్యత్తులో ఉన్నత పదవులను అధిరోహించగలరు.
జీవిత ప్రయాణంలో ఎదురయ్యే సవాళ్లను ఎదుర్కోవడానికి శ్రమ ఒక్కటే సరైన మార్గం. నిరంతరం శ్రమిస్తూ ఉంటే విధి కూడా తలవంచక తప్పదు. కష్టపడి పనిచేసే సంస్కృతిని మనం అలవరచుకోవాలి. పరుల మీద ఆధారపడకుండా స్వయంకృషితో ఎదగడంలో ఉండే గర్వం వెలకట్టలేనిది. శ్రమ వల్ల కలిగే ప్రతిఫలం కేవలం ఒక వ్యక్తికే కాకుండా ఆ కుటుంబానికి, దేశానికి కూడా మేలు చేస్తుంది. ప్రతి ఒక్కరూ తమ వంతు శ్రమను సమాజానికి అందిస్తే దేశం త్వరగా అభివృద్ధి చెందుతుంది. సోమరితనాన్ని వదిలి శ్రమను స్నేహితుడిగా చేసుకుంటే జీవితం సాఫీగా సాగుతుంది. శ్రమయే సౌందర్యం. శ్రమను గౌరవించే సమాజం ఎప్పుడూ ఉన్నతంగా ఉంటుంది. అందుకే కష్టే ఫలి అని పెద్దలు చెప్పారు. మనం ఎంతగా శ్రమిస్తామో ఫలితం కూడా అంత గాఢంగా ఉంటుంది. భవిష్యత్తును బంగారుమయం చేసుకోవడానికి కష్టపడి పనిచేయడం కంటే మరో గొప్ప మార్గం లేదు. నిరంతర శ్రమతోనే విజ్ఞానం, వివేకం అలవడతాయి. శ్రమిద్దాం, విజయ తీరాలను చేరుకుందాం. పనిలో నిమగ్నమైనప్పుడు కలిగే ఏకాగ్రత ఒక విధమైన ధ్యానం వంటిది. నిరంతర సాధనతోనే నైపుణ్యం పెరుగుతుంది. సమాజంలో గొప్ప మార్పులు తేవడానికి కూడా శ్రమ పునాదిగా ఉండాలి. ప్రతి అడుగులోనూ శ్రమను జోడిస్తే అపజయాలు దరిచేరవు. కష్టపడే మనిషి ఎప్పుడూ ఒంటరివాడు కాదు. అతడి కష్టం అతడికి తోడుగా ఉంటుంది. విజయం సాధించిన తర్వాత కలిగే ఆనందం వెనుక ఉన్న కష్టమే ఆ విజయానికి అసలైన అందాన్ని ఇస్తుంది. ఒక లక్ష్యం కోసం పడే తపన, చేసే కష్టం మనిషిని పరిపూర్ణుడిని చేస్తాయి. అడ్డంకులను చూసి భయపడకుండా ఎదురీదడం శ్రమించే వారి లక్షణం. అపజయాలు ఎదురైనప్పుడు అవి నేర్పే పాఠాలను అందిపుచ్చుకుని మరింత ఉత్సాహంతో పని చేయడం విజయానికి బాటలు వేస్తుంది. ప్రతి రోజూ క్రమం తప్పకుండా చేసే చిన్న చిన్న ప్రయత్నాలు పెద్ద విజయాలకు పునాదులు వేస్తాయి. శ్రమ జీవికి లోకం నీరాజనాలు పడుతుంది. కష్టపడి పనిచేయడం వల్ల వచ్చే కీర్తి ప్రతిష్టలు చిరస్థాయిగా నిలిచిపోతాయి.
(సి.హెచ్.ప్రతాప్)
