ఉత్తర అట్లాంటిక్ మహాసముద్ర పశ్చిమ భాగంలో విస్తరించి ఉన్న బెర్ముడా త్రికోణం ప్రపంచంలోని అత్యంత వింతైన భయంకరమైన ప్రాంతాలలో ఒకటిగా గుర్తింపు పొందింది. ఫ్లోరిడా బెర్ముడా దీవులు పోర్టో రికోలను కలిపే ఈ ఊహాజనిత త్రికోణ ప్రాంతం సుమారు ఐదు లక్షల చదరపు క్రోసుల విస్తీర్ణంలో వ్యాపించి ఉంది. గత శతాబ్ద కాలంలో ఇక్కడ వందలాది విమానాలు నౌకలు ఎటువంటి ఆనవాళ్లు లేకుండా అదృశ్యం కావడం వల్ల దీనిని దెయ్యాల త్రికోణం అని కూడా పిలుస్తారు. ఈ ప్రాంతం వెనుక ఉన్న వింతలు విజ్ఞాన శాస్త్రానికి మానవ ఊహలకు మధ్య ఒక పెద్ద సవాలుగా నిలిచాయి. ఇక్కడ ప్రయాణించే వారు తిరిగి రారనే భయం ఎంతో కాలంగా నావికులను విమాన చోదకులను వెంటాడుతోంది. సముద్ర గర్భంలో దాగి ఉన్న రహస్యాలను ఛేదించడానికి ఎందరో ప్రయత్నించినా ఫలితం దక్కలేదు. సామాన్య మానవుడికి అంతుచిక్కని శక్తులు ఇక్కడ పనిచేస్తున్నాయనే భావన ప్రపంచవ్యాప్తంగా వ్యాపించింది.
ఈ ప్రాంతం గురించి వింత కథలు ప్రచారంలోలోకి రావడానికి ప్రధాన కారణం 1945లో జరిగిన విమాన ప్రమాదం. అమెరికా నావికాదళానికి చెందిన ఐదు యుద్ధ విమానాలు శిక్షణలో భాగంగా ఈ ప్రాంతం మీదుగా వెళ్తూ అకస్మాత్తుగా అదృశ్యమయ్యాయి. ఆ విమానాల్లో ఉన్న పద్నాలుగు మంది విమాన చోదకులు ఏమయ్యారో ఇప్పటికీ ఎవరికీ తెలియదు. విచిత్రమేమిటంటే వాటిని వెతకడానికి వెళ్లిన మరో రక్షణ విమానం కూడా తిరిగి రాలేదు. అంతకుముందు 1918లో మూడు వందల మంది ప్రయాణికులతో వెళ్తున్న ఒక భారీ నౌక ఎటువంటి ప్రమాద సంకేతాలు పంపకుండానే సముద్ర గర్భంలో కలిసిపోయింది. ఇటువంటి వరుస ఘటనలు ఈ ప్రాంతంపై భయంకరమైన అపోహలను సృష్టించాయి. ఆ సమయంలో వాతావరణం ప్రశాంతంగా ఉన్నప్పటికీ ఇటువంటి ప్రమాదాలు జరగడం శాస్త్రవేత్తలను సైతం విస్మయానికి గురిచేసింది. అదృశ్యమైన వారి కుటుంబ సభ్యులకు కనీసం వారి మృతదేహాలు కూడా దొరకకపోవడం అత్యంత విషాదకరమైన విషయం.
బెర్ముడా త్రికోణం గురించి అనేక వింతైన ప్రతిపాదనలు ప్రచారంలో ఉన్నాయి. కొందరు ఇక్కడ గ్రహాంతరవాసుల సంచారం ఉందని నమ్మితే మరికొందరు సముద్రం అడుగున ఉన్న పురాతన అట్లాంటిస్ నగరపు అతీంద్రియ శక్తులే దీనికి కారణమని భావిస్తారు. అయితే వైజ్ఞానికంగా పరిశీలిస్తే ఇక్కడ అయస్కాంత క్షేత్రంలో వచ్చే మార్పుల వల్ల దిక్సూచిలు తప్పుగా పనిచేస్తాయని తెలుస్తోంది. అలాగే సముద్ర గర్భం నుండి వెలువడే మిథేన్ వాయు బుడగలు నీటి సాంద్రతను తగ్గించి నౌకలు త్వరగా మునిగిపోయేలా చేస్తాయని పరిశోధకులు చెబుతారు. ఆకాశంలో ఏర్పడే అసాధారణ వాయు మేఘాలు విమానాల యంత్రాలను దెబ్బతీసే అవకాశం ఉందని కూడా ఒక వాదన ఉంది. ఈ సహజ సిద్ధమైన కారణాల వల్ల విమానాలు నియంత్రణ కోల్పోయి సముద్రంలో పడిపోతున్నాయని కొందరు నిపుణులు అభిప్రాయపడుతున్నారు. సముద్రపు లోతుల్లో ఉండే నీటి సుడిగుండాలు కూడా భారీ నౌకలను సులభంగా మింగేయగలవని భావిస్తున్నారు.
అంతర్జాతీయ సముద్ర పరిశోధన సంస్థలు దీనిని ఒక పెద్ద రహస్యంగా అంగీకరించవు. వారి విశ్లేషణ ప్రకారం ఈ ప్రాంతంలో ప్రవహించే గల్ఫ్ ప్రవాహం కారణంగా వాతావరణం క్షణక్షణానికి మారిపోతూ ఉంటుంది. సముద్రంలో ఆకస్మికంగా వచ్చే భారీ అలలు తుఫానుల వల్ల ప్రమాదాలు జరుగుతాయని వారి అభిప్రాయం. ప్రపంచంలోని ఇతర సముద్ర ప్రాంతాలతో పోలిస్తే ఇక్కడ ప్రమాదాల శాతం ఏమంత ఎక్కువగా లేదని రికార్డులు చెబుతున్నాయి. ఇక్కడ రద్దీ ఎక్కువగా ఉండటం వల్ల జరిగే సాధారణ ప్రమాదాలనే రహస్యంగా చిత్రీకరించారని పరిశోధకులు పేర్కొన్నారు. మానవ తప్పిదాలు సాంకేతిక లోపాలు కూడా ఇటువంటి అదృశ్యాలకు ప్రధాన కారణాలుగా మారుతున్నాయి. సముద్రపు లోతుల్లో ఉండే పర్వతాలు లోయలు నౌకల శిథిలాలను వెతకడానికి ఆటంకంగా మారుతున్నాయి. ఆధునిక కాలంలో ఉపగ్రహాల సాయంతో ఈ ప్రాంతాన్ని పర్యవేక్షిస్తున్నప్పటికీ కొన్ని సంఘటనలకు ఇప్పటికీ సరైన సమాధానం దొరకడం లేదు.
నేటి ఆధునిక సాంకేతిక పరిజ్ఞానం నిఘా వ్యవస్థల వల్ల ఇటువంటి ప్రమాదాల సంఖ్య గణనీయంగా తగ్గింది. శాస్త్రవేత్తలు ఎన్ని వివరణలు ఇస్తున్నప్పటికీ ఈ ప్రాంతం పట్ల సామాన్య ప్రజలలో ఉన్న ఆసక్తి భయం మాత్రం తగ్గలేదు. మాయమైన నౌకల శిథిలాలు దొరకకపోవడం లోతైన సముద్ర గృహాలు ఈ త్రికోణాన్ని ఇప్పటికీ ఒక అపరిష్కృత రహస్యంగానే ఉంచాయి. బెర్ముడా త్రికోణం అనేది కేవలం ప్రకృతి వైపరీత్యమా లేక మానవ జ్ఞానానికి అందని మరేదైనా శక్తా అన్నది భవిష్యత్తులో మరిన్ని పరిశోధనల ద్వారా మాత్రమే తేలాల్సి ఉంది. ప్రకృతిలోని రహస్యాలను ఛేదించే క్రమంలో బెర్ముడా త్రికోణం మానవ మేధస్సుకు ఎప్పటికీ ఒక అద్భుతమైన పాఠంగానే మిగిలిపోతుంది. ఆకాశం నుండి సముద్రం వరకు విస్తరించిన ఈ వింతలు మనల్ని ఎప్పుడూ ఆలోచింపజేస్తూనే ఉంటాయి. అన్వేషించే కొద్దీ కొత్త విషయాలు వెలుగులోకి వస్తూనే ఉంటాయి. మానవ విజ్ఞానం పెరిగే కొద్దీ ఈ రహస్యాల ముడి విడిపోతుందని ఆశిద్దాం. సామాన్య ప్రజలలో నెలకొన్న భయాందోళనలను తొలగించడానికి మరింత పారదర్శకమైన పరిశోధనలు అవసరమని పరిశీలకులు భావిస్తున్నారు. భవిష్యత్తులో ఈ ప్రాంతం గురించిన మరిన్ని ఆసక్తికరమైన అంశాలు వెలుగులోకి వచ్చే అవకాశం ఉంది.
(సి.హెచ్.ప్రతాప్)
