ప్రపంచవ్యాప్తంగా పట్టణీకరణ వేగంగా విస్తరిస్తున్న నేటి కాలంలో అత్యంత వేగంగా వృద్ధి చెందుతున్న నగరాల జాబితాలో భారతదేశానికి చెందిన నగరాలు అగ్రస్థానంలో నిలుస్తున్నాయి. ముఖ్యంగా కేరళ రాష్ట్రంలోని మలప్పురం నగరం ప్రపంచంలోనే అత్యంత వేగంగా అభివృద్ధి చెందుతున్న నగరంగా అంతర్జాతీయ గుర్తింపు పొందింది. ఆర్థికవేత్తల పరిశోధన మరియు జనాభా గణాంకాల ప్రకారం గత దశాబ్ద కాలంలో ఈ నగరం చూపిన వృద్ధి రేటు అందరినీ ఆశ్చర్యానికి గురి చేస్తోంది. మలప్పురంతో పాటు కేరళలోని కోజికోడ్ మరియు కొల్లాం నగరాలు కూడా ప్రపంచంలోని టాప్ టెన్ అత్యంత వేగంగా పెరుగుతున్న నగరాల జాబితాలో చోటు సంపాదించుకున్నాయి. ఇది దక్షిణ భారతదేశంలో మారుతున్న ఆర్థిక స్థితిగతులకు మరియు అభివృద్ధి వికేంద్రీకరణకు ఒక నిదర్శనం.
మలప్పురం నగరం ఇంత వేగంగా వృద్ధి చెందడానికి అనేక కారణాలు ఉన్నాయి. ఇక్కడి ప్రజలు విదేశాల్లో ముఖ్యంగా గల్ఫ్ దేశాలలో ఉపాధి పొంది అక్కడి నుండి పంపే నిధులు నగర ఆర్థిక వ్యవస్థకు వెన్నెముకగా నిలుస్తున్నాయి. దీనివల్ల నగరంలో గృహ నిర్మాణం, వాణిజ్యం మరియు విద్యాసంస్థలు భారీగా విస్తరించాయి. నగర శివారు ప్రాంతాలు వేగంగా పట్టణీకరణ చెందడం వల్ల మున్సిపల్ పరిధులు విస్తరించి జనాభా గణనీయంగా పెరిగింది. కేరళ ప్రభుత్వం చేపట్టిన మౌలిక సదుపాయాల కల్పన మరియు రవాణా సౌకర్యాల మెరుగుదల కూడా ఈ వృద్ధికి తోడ్పడ్డాయి. కేవలం జనాభా పరంగానే కాకుండా జీవన ప్రమాణాల పరంగా కూడా ఈ నగరం మెరుగైన ఫలితాలను సాధిస్తోంది. అక్షరాస్యత మరియు ఆరోగ్య రంగాలలో మలప్పురం సాధించిన ప్రగతి ఇతర నగరాలకు ఆదర్శంగా నిలుస్తోంది.
భారతదేశంలోని ఇతర నగరాలైన సూరత్, విజయవాడ మరియు హైదరాబాద్ కూడా ఈ రేసులో ఎంతో ముందున్నాయి. గుజరాత్లోని సూరత్ నగరం వజ్రాల పరిశ్రమ మరియు వస్త్ర పరిశ్రమ పుణ్యమా అని వేగంగా విస్తరిస్తోంది. ఆంధ్రప్రదేశ్ లోని విజయవాడ నగరం భౌగోళికంగా ఉన్న ప్రాధాన్యత వల్ల వ్యాపార మరియు విద్యా కేంద్రంగా మారుతోంది. అయితే మలప్పురం నగరం సాధించిన వృద్ధి రేటు సుమారు 44 శాతంగా ఉండటం గమనార్హం. ప్రపంచవ్యాప్తంగా ఉన్న మెగాసిటీలతో పోలిస్తే ఇలాంటి చిన్న పట్టణాలు వేగంగా అభివృద్ధి చెందడం వల్ల వనరుల పంపిణీ సమతుల్యంగా జరుగుతుందని నిపుణులు అభిప్రాయపడుతున్నారు. ఆఫ్రికా మరియు ఆసియా ఖండాల్లోని నగరాలు భవిష్యత్తులో ప్రపంచ ఆర్థిక వృద్ధికి చోదక శక్తులుగా మారనున్నాయని అంతర్జాతీయ నివేదికలు స్పష్టం చేస్తున్నాయి.
అత్యంత వేగంగా వృద్ధి చెందడం వల్ల కొన్ని సవాళ్లు కూడా ఎదురవుతున్నాయి. జనాభాకు తగ్గట్లుగా మురుగునీటి పారుదల, వ్యర్థాల నిర్వహణ మరియు పర్యావరణ పరిరక్షణ వంటి అంశాలపై దృష్టి సారించాల్సిన అవసరం ఉంది. ప్రణాళికాబద్ధమైన పట్టణీకరణ జరగకపోతే భవిష్యత్తులో ట్రాఫిక్ మరియు కాలుష్య సమస్యలు తలెత్తే అవకాశం ఉంది. మలప్పురం వంటి నగరాలు తమ సహజ సిద్ధమైన అందాలను కాపాడుకుంటూనే ఆధునిక సాంకేతికతను అందిపుచ్చుకోవడం ఒక గొప్ప విషయం. ఐటి రంగం మరియు పర్యాటక రంగం కూడా ఇక్కడ క్రమంగా పుంజుకుంటున్నాయి. ప్రపంచ పటంలో ఒక సాధారణ పట్టణంగా ఉన్న మలప్పురం నేడు వేగవంతమైన వృద్ధికి మారుపేరుగా నిలవడం ప్రతి భారతీయుడు గర్వించదగ్గ విషయం. ఈ అభివృద్ధి కేవలం సంఖ్యలకే పరిమితం కాకుండా సామాన్య ప్రజల జీవన ప్రమాణాలను పెంపొందించే దిశగా సాగడం విశేషం.
(సి.హెచ్.ప్రతాప్)
