సీఎం పేషీ పేరుతో భారీ మోసం

అనకాపల్లి, జనవరి 23, జయ జయ హే: ముఖ్యమంత్రి కార్యాలయంలో ఉన్నత స్థాయి పరిచయాలు ఉన్నాయని, ప్రభుత్వ ఉద్యోగాలు ఇప్పిస్తామని నమ్మించి సామాన్యులను మోసం చేస్తున్న అంతర్ జిల్లా మోసగాళ్ల ముఠాను అనకాపల్లి జిల్లా పోలీసులు అరెస్ట్ చేశారు. జిల్లా ఎస్పీ తుహిన్ సిన్హా ఆదేశాల మేరకు రోలుగుంట పోలీసులు ఈ ఆపరేషన్‌ను విజయవంతంగా పూర్తి చేశారు.
అనకాపల్లి జిల్లా ​రోలుగుంట మండలానికి చెందిన ఒక మహిళ డీఎస్సీ పరీక్షకు సిద్ధమవుతుండగా, ప్రకాశం జిల్లాకు చెందిన ఎరగోర్ల శ్రీను అనే వ్యక్తి ఆమె భర్తకు పరిచయమయ్యాడు. తనకు సీఎం కార్యాలయంలో పెద్దవారితో సంబంధాలు ఉన్నాయని, రూ.15 లక్షలు ఇస్తే ఫిబ్రవరి 2025 డీఎస్సీలో ఎస్జీటీ పోస్టు ఇప్పిస్తానని నమ్మబలికాడు. బాధితులకు నమ్మకం కలిగించేందుకు స్వయంగా ముఖ్యమంత్రి నారా చంద్రబాబు నాయుడు మాట్లాడుతున్నట్లుగా రూపొందించిన ఒక నకిలీ ఆడియో క్లిప్పింగ్‌ను పంపాడు. బాధితులకు అనుమానం వచ్చినప్పుడల్లా మంత్రి నారా లోకేష్ పీఏ భార్గవ్ చౌదరి మాట్లాడుతున్నట్లుగా మరొక వ్యక్తితో కాన్ఫరెన్స్ కాల్ మాట్లాడించాడు. ఉద్యోగం పేరుతో నిందితులు బాధితుల నుంచి విడతల వారీగా దాదాపు రూ.12.13 లక్షలు వసూలు చేశారు.
​​ఉద్యోగం రాకపోవడంతో బాధితులు రోలుగుంట పోలీసులను ఆశ్రయించారు. దీనిపై విచారణ చేపట్టిన పోలీసులు సాంకేతిక ఆధారాలతో నిందితులను పట్టుకున్నారు.
ఎరగోర్ల శ్రీను (ప్రధాన నిందితుడు): ప్రకాశం జిల్లాకు చెందిన ఇతడిని ఈ నెల 16న అరెస్ట్ చేశారు. ఇతను గతంలో విజయవాడలో లైన్మెన్ పోస్ట్ పేరుతో రూ.2.50 లక్షలు, అద్దంకిలో ఎస్సై పోస్ట్ పేరుతో రూ.11 లక్షలు వసూలు చేసిన పాత నేరస్తుడు.
అలాగే షేక్ సలీం (రెండవ నిందితుడు) విజయవాడకు చెందిన ఇతను శ్రీను ఇచ్చిన రూ.50 వేల కోసం మంత్రి పీఏ గా నటించి బాధితులను బెదిరించాడు. ఇతడిని శుక్రవారం విజయవాడలో అరెస్ట్ చేశారు. ఈ సందర్భంగా జిల్లా ఎస్పీ మాట్లాడుతూ”ప్రభుత్వ ఉద్యోగాలు కేవలం మెరిట్ ప్రాతిపదికన, అధికారిక ప్రక్రియ ద్వారానే భర్తీ చేయబడతాయి. సీఎం పీషీ, మంత్రుల పీఏల పేరు చెప్పి ఎవరైనా డబ్బులు అడిగితే నమ్మవద్దు. ఇటువంటి మోసగాళ్ల పట్ల ప్రజలు అప్రమత్తంగా ఉండాలి,” అని సూచించారు.
​సమర్థవంతంగా పని చేసి నిందితులను పట్టుకున్న అనకాపల్లి సబ్ డివిజన్ డీఎస్పీ ఎం.శ్రావణి, కొత్తకోట సీఐ జి.కోటేశ్వరరావు, రోలుగుంట ఎస్సై పి.రామకృష్ణారావు, సిబ్బందిని ఎస్పీ ప్రత్యేకంగా అభినందించారు.